GEN 1.2  Агаарын хөлөг нисэн ирэх, дамжин өнгөрөх ба нисэн гарах

1.  Ерөнхий

1.1 Хоёр буюу түүнээс дээш улсын агаарын зайд үйлдэх нислэгийг олон улсын нислэг гэнэ.
1.2 Монгол Улсын агаарын зайд үйлдэх нислэгийг дараах байдлаар ангилна:

  1. Хуваарьт нислэг

  2. Хуваарьт бус нислэг

1.3 Монгол Улсын агаарын зайд үйлдэх хуваарьт болон хуваарьт бус нислэг Иргэний нисэхийн ерөнхий газар (цаашид “ИНЕГ” гэх)-аас олгосон нислэгийн зөвшөөрлийн дагуу үйлдэгдэнэ.
1.4 Нислэгийн урсгал төлөвлөлтийн алба нь нислэгийн хүсэлт гаргагчаас ирүүлсэн нислэгийн хүсэлт, түүнд холбогдох баримт бичгийг хүлээн авч, журмын дагуу нислэгийн хөдөлгөөний урсгал төлөвлөлтийн менежментийг хэрэгжүүлж, ИНЕГ-ын нэрийн өмнөөс нислэгийн зөвшөөрөл олгоно.
1.5 Нислэгийн хөдөлгөөнийг төлөвлөх, зөвшөөрөл олгохдоо Монгол Улсын агаарын зайд үйлдэгдэх нислэгийн хөдөлгөөн, агаарын зайн болон нисэх буудлын багтаамжийг харгалзана.
1.6 Олгосон зөвшөөрлийн дагуу нислэг үйлдэхээс өмнө нислэгийн хүсэлт гаргагч нь ENR 1.10 ба ENR 1.11-ийн дагуу Нислэгийн урсгал төлөвлөлтийн алба болон холбогдох бусад албадуудад нислэгийн төлөвлөгөөгөө ирүүлнэ.
1.7 Олон улсын нислэгт олгогдсон зөвшөөрөл нь тухайн нислэг эхлэх цагаас хойш 72 цагийн хугацаанд хүчин төгөлдөр байна.
1.8 Орон нутгийн нислэгт олгогдсон зөвшөөрөл нь тухайн нислэг эхлэх цагаас хойш 48 цагийн хугацаанд хүчин төгөлдөр байна.
1.9 Тусгай үүргийн нислэгт олгогдсон зөвшөөрөл нь тухайн нислэг эхлэх цагаас хойш 24 цагийн хугацаанд хүчин төгөлдөр байна.
1.10 Дамжин өнгөрөх нислэгийн онцгой тохиолдлын буултын үед тухайн нислэгт олгогдсон зөвшөөрөл хүчинтэй байна.
1.11 Нислэгийн төлөвлөгөө, хүсэлт болон түүнд холбогдох баримт бичгийн мэдээллийн үнэн зөв, хүчин төгөлдөр байдлыг нислэгийн хүсэлт гаргагч бүрэн хариуцна.
1.12 Нислэг үйлдэхэд шаардагдах баримт бичигт өөрчлөлт орсон талаарх мэдээллийг нислэгийн хүсэлт гаргагч тогтмол шинэчлэн ирүүлнэ.
1.13 Гадаад улсын онцгой үүргийн болон албан захиалгат нислэгийн хүсэлтийг гадаад харилцааны асуудал эрхэлсэн төрийн захиргааны төв байгууллагаар, дотоодын онцгой үүргийн болон албан захиалгат нислэгийн хүсэлтийг Төрийн тусгай хамгаалалтын газраар тус тус дамжуулан хүлээн авна.
1.14 Улсын агаарын хөлгийн нислэгийг агаарын зайг нисэхэд ашиглах тухай хууль, улсын нисэхийн тухай хууль, Улсын агаарын хөлгийн онцгой болон тусгай үүргийн нислэгийн хөдөлгөөнийг зохицуулах хамтарсан журмын дагуу зохицуулна.
1.15 Агаарын тээвэрлэгч нь Монгол Улсын хил болон хилийн агаарын бүс орчимд нислэг үйлдэх тохиолдолд Монгол Улсын хилийн тухай хууль, агаарын зайг нисэхэд ашиглах тухай хууль, Монгол-Хятадын хилийн дэглэмийн тухай Монгол-БНХАУ-ын Засгийн газар хоорондын гэрээ, Орос-Монголын хилийн дэглэмийн тухай гэрээ, холбогдох бусад дүрэм, журмыг мөрдлөгө болгоно.
1.15.1 Дархан цаазат газарт нислэг үйлдэх тохиолдолд Тусгай хамгаалалттай газар нутгийн тухай хуулийн 12 дугаар зүйлийн 8 дах хэсгийг дагаж мөрдөнө.
1.16 Нислэгийн үйл ажиллагааг холбогдох иргэний нисэхийн дүрмээр зохицуулна.
1.17 Нислэгийн хүсэлт гаргагч (гадаад улс)-аас ирүүлсэн орон нутгийн хуваарьт бус арилжааны нислэг үйлдэх хүсэлтэд тухайн улстай байгуулсан, Засгийн газар хоорондын агаарын харилцааны хэлэлцээрийг үндэслэн нислэгийн зөвшөөрөл олгоно.
1.18 Нислэгийн хүсэлт гаргагчаас ирүүлсэн олон улсын хуваарьт бус хөөрөлт, буултын нислэгийн хүсэлт, түүнд холбогдох баримт бичгийн бүрдлийг хүлээн авч, агаарын зайн болон нисэх буудлын багтаамж, газрын үйлчилгээний мэдээлэл зэрэг бусад хүчин зүйлүүдийг харгалзан нислэгийн зөвшөөрөл олгох эсэхийг шийдвэрлэнэ.
1.19 Зөвшөөрөл олгох тохиолдолд агаарын зайн болон нисэх буудлын багтаамж, газрын үйлчилгээний мэдээлэл зэрэг бусад хүчин зүйлүүдийг харгалзан нислэгийн өдөр, цагийг өөрчлүүлж болно.
1.20 Баримт бичгийн бүрдэл дутуу, зөрчилтэй, хугацаа дууссан, хүчингүй болсон, агаарын зайн болон нисэх буудлын багтаамж, нислэгийн аюулгүй байдалд сөргөөр нөлөөлөх хүчин зүйлсээс шалтгаалан нислэгийн зөвшөөрөл олгохоос татгалзаж болно.
1.20.1 Нислэгийн хүсэлт гаргагчид нислэгийн зөвшөөрөл олгох баримт бичгийн шаардлага хангаагүйгээс үүдэн нислэгийн зөвшөөрөл олгохоос татгалзсан тохиолдолд гарах үр дагавар, хариуцлагыг ИНЕГ хариуцахгүй.
1.21 Нислэгийн урсгал төлөвлөлтийн албаны удирдлагын холбогдох утас:

Утас: 976-71283105 /Дарга/

2.  Хуваарьт нислэгүүд

2.1 Олон нийтэд нээлттэй зарласан цагийн хуваарийн дагуу тогтмол давтамжтайгаар гүйцэтгэх нислэгийг хуваарьт буюу тогтмол нислэг гэнэ.
2.2 Нислэгийн хүсэлт гаргагч нь Монгол Улсын агаарын зайд үйлдэх олон улсын болон орон нутгийн хуваарьт нислэгийн хүсэлтийг тухайн нислэг эхлэхээс хуанлийн 30-аас багагүй хоногийн өмнө ирүүлнэ.
2.3 Нислэгийн хүсэлт гаргагч нь олон улсын хуваарьт нислэгийн хүсэлтийг журмын “А” маягтын, орон нутгийн хуваарьт нислэгийн хүсэлтийг “С” маягтын дагуу дараах хаягуудаар ирүүлнэ.

СИТА: ULNUGOM

Утас: 976-71282213 – Олон улсын нислэг

Утас: 976-71283106 – Орон нутгийн нислэг

Факс: 976-70049981

Ц/ш: fpd@mcaa.gov.mn

2.4 Тухайн нислэгт ямар нэгэн шалтгаанаар өөрчлөлт орсон тохиолдолд агаарын тээвэрлэгч нь Нислэгийн урсгал төлөвлөлтийн албаны AFS сүлжээ: ZMUBYAYX; ZMUBZGZX; цахим шуудан болон SITA сүлжээ: ULNUGOM; ULNKKOM гэсэн хаягаар мэдэгдсэн байна.

3.  Хуваарьт бус нислэг

3.1 Хуваарьт нислэгээс бусад нислэгийг хуваарьт бус нислэг гэнэ.
3.2 Нислэгийн хүсэлт гаргагчийн урьдчилан ирүүлсэн хүсэлтийн дагуу Нислэгийн урсгал төлөвлөлтийн албанаас олгосон зөвшөөрлийг үндэслэн хуваарьт бус нислэгийг гүйцэтгэнэ.

Нислэгийн урсгал төлөвлөлтийн албаны Нислэгийн төлөвлөлт, зөвшөөрлийн хэсэг

СИТА: ULNUGOM

Утас: 976-71282029 – Олон улсын нислэг

Утас: 976-71283106 – Орон нутгийн нислэг

Факс:  976-70049981

Ц/ш:  fpd@mcaa.gov.mn

Нислэгийн урсгал төлөвлөлтийн албаны Шуурхай төлөвлөлтийн хэсэг

AFS: ZMUBZGZX, ZMUBYAYX

СИТА: ULNKKOM

Утас: 976-71281602

Факс: 976-70049680

Ц/ш: tpu@mcaa.gov.mn

3.3 Олон улсын хуваарьт бус нислэгийн хүсэлтийг “B” маягтын дагуу ирүүлнэ.
3.4  Олон улсын хуваарьт бус нислэгийн хүсэлт
3.4.1 Нислэгийн хүсэлт гаргагч нь онцгой үүргийн болон албан захиалгат нислэгийн хүсэлтийг нислэг эхлэхээс хуанлийн 2 хоногийн өмнө “В” маягтын дагуу ирүүлнэ.
3.4.2 Нислэгийн хүсэлт гаргагч нь олон улсын өнгөрөлтийн болон хөөрөлт, буултын нислэгийн хүсэлтийг нислэг эхлэхээс ажлын 2-оос доошгүй хоногийн өмнө “В” маягт болон түүнд багтсан мэдээллийн дагуу ирүүлнэ.
3.4.3 Нислэг эхлэхээс хуанлийн 1 хоногийн өмнө нислэгийн хүсэлтийг ирүүлсэн тохиолдолд агаарын навигацийн хураамжийн төлбөрийг нэмэгдэл төлбөртэй тооцож, нислэгийн зөвшөөрлийг олгоно.
3.4.4 Нислэг эхлэхээс 6-аас багагүй цагийн өмнө нислэгийн хүсэлтийг ирүүлсэн тохиолдолд агаарын навигацийн хураамжийн төлбөрийг нэмэгдлийн нэмэгдэл төлбөртэй тооцож, нислэгийн зөвшөөрлийг олгоно.
3.4.5 Нислэгийн хүсэлт гаргагч нь тусгай үүргийн, хүмүүнлэгийн, түргэн тусламжийн, агаарын хөлөгт дутагдал гарч нислэг үйлдэх боломжгүй болсон үед өөр агаарын хөлгөөр нислэг үйлдэх, зорчигчдыг тээвэрлэх, сэлбэг хүргэх, навигацийн тоног төхөөрөмж болон техникийн шалгах нислэгийн хүсэлтийг “В” маягтын дагуу өнгөрөлтийн нислэг эхлэхээс 30 минутын өмнө, хөөрөлт буултын нислэг эхлэхээс 1 цагийн өмнө тус тус ирүүлнэ.
3.5  Орон нутгийн хуваарьт бус нислэгийн хүсэлт
3.5.1 Нислэгийн хүсэлт гаргагч нь иргэний агаарын хөлгөөр онцгой үүргийн нислэг үйлдэх нислэгийн хүсэлтийг хуанлийн 1 хоногийн өмнө "D" маягтын дагуу ирүүлнэ.
3.5.2 Нислэгийн хүсэлт гаргагч нь тусгай үүргийн, хүмүүнлэгийн, түргэн тусламжийн, агаарын хөлөгт дутагдал гарч нислэг үйлдэх боломжгүй болсон үед өөр агаарын хөлгөөр нислэг үйлдэх, зорчигчдыг тээвэрлэх, сэлбэг хүргэх, навигацийн тоног төхөөрөмж болон техникийн шалгах нислэгийн хүсэлтийг “D” маягтын дагуу нислэг эхлэхээс 30 минутын өмнө ирүүлнэ.
3.5.3 Нислэгийн хүсэлт гаргагч нь улсын агаарын хөлгөөр онцгой үүргийн нислэг үйлдэх бол 2 хоногийн өмнө "D" маягтын дагуу ирүүлнэ.
3.5.4 Нислэгийн хүсэлт гаргагч нь хуваарьт бус нислэгийн хүсэлтийг нислэг эхлэхээс 2-оос багагүй цагийн өмнө ирүүлнэ.
4.  Нислэгийн өөрчлөлт
4.1  Ерөнхий шаардлага
4.1.1 Олон улсын болон орон нутгийн батлагдсан хуваарьт хөөрөлт, буултын нислэгийн цагийн хуваарьт 5 буюу түүнээс дээш тогтмол шинжтэй өөрчлөлт оруулах буюу нэмэгдэл нислэгийн хүсэлтийг Цагийн хуваарийн зөвлөлд хүргүүлнэ.
4.2  Өнгөрөлтийн нислэгийн өөрчлөлт
4.2.1 Нислэгийн хүсэлт гаргагч нь хуваарьт нислэгийн төлөвлөлтөд нэг удаагийн нислэг нэмэх тохиолдолд нислэгийн хүсэлтийг ажлын 2 хоногийн өмнө “A” маягт эсхүл түүнд багтсан мэдээллийн дагуу ирүүлнэ.
4.2.2 Нислэгийн хүсэлт гаргагч нь нислэгийн төлөвлөлтөд 1 удаагийн өөрчлөлт оруулах болон цуцалсан нислэгийн мэдээллийг тухай бүр ирүүлнэ.
4.2.3 Нислэгийн хүсэлт гаргагч нь хуваарьт нислэгийн төлөвлөлтөд 2 буюу түүнээс дээш өөрчлөлт болон нэмэгдэл нислэгийн хүсэлтийг нислэг эхлэхээс ажлын 5 хоногийн өмнө "А" маягт эсхүл түүнд багтсан мэдээллийн дагуу ирүүлнэ.
4.3  Хөөрөлт, буултын нислэгийн өөрчлөлт
4.3.1 Нислэгийн хүсэлт гаргагч нь хөөрөлт, буултын нислэгийн төлөвлөлтөд 1 удаагийн өөрчлөлт оруулах тохиолдолд нислэгийн хүсэлтийг холбогдох тайлбарын хамт нислэг эхлэхээс 1 цагаас багагүй хугацаанд ирүүлнэ.
4.3.2 Нислэгийн хүсэлт гаргагч нь батлагдсан хуваарьт нислэгийн төлөвлөлтөд 2-4 удаагийн өөрчлөлт оруулах болон нэмэгдэл нислэгийн хүсэлтийг нислэг эхлэхээс ажлын 5 хоногийн өмнө "А" маягтын дагуу ирүүлнэ.

5.  Баримт бичигт тавигдах шаардлага

5.1  Хуваарьт нислэг
5.1.1 Нислэгийн хүсэлт гаргагч нь өнгөрөлтийн нислэг шинээр үйлдэхэд дараах баримт бичгийг бүрдүүлнэ. Үүнд:

  1. Агаарын тээвэрлэгчийн гэрчилгээ;

  2. Нислэгт тэнцэх чадварын гэрчилгээ ("А" маягтад заасан бүх агаарын хөлгийн);

  3. Агаарын хөлгийн улсын бүртгэлийн гэрчилгээ ("А" маягтад заасан бүх агаарын хөлгийн);

  4. Агаарын хөлгийн дуу чимээний гэрчилгээ (Шаардлагатай тохиолдолд нэмэлтээр авна);

  5. Даатгалын мэдээлэл;

  6. Агаарын тээвэрлэгчийн албан ёсны хаяг.

5.1.2 Нислэгийн хүсэлт гаргагч (гадаад улсын) нь олон улсын хөөрөлт, буултын нислэг шинээр үйлдэхэд дараах баримт бичгийг бүрдүүлнэ. Үүнд:

  1. Агаарын тээвэрлэгчийн ИНД-129 “Гадаадын агаарын тээвэрлэгчийн гэрчилгээжүүлэлт” дүрмийн дагуу гэрчилгээжсэн гэрчилгээ;

  2. Нислэгт тэнцэх чадварын гэрчилгээ ("А" маягтад заасан бүх агаарын хөлгийн);

  3. Агаарын хөлгийн улсын бүртгэлийн гэрчилгээ ("А" маягтад заасан бүх агаарын хөлгийн);

  4. Агаарын хөлгийн дуу чимээний гэрчилгээ (Шаардлагатай тохиолдолд нэмэлтээр авна);

  5. Даатгалын мэдээлэл;

  6. Газрын үйлчилгээний мэдээлэл;

  7. Агаарын тээвэрлэгчийн албан ёсны хаяг;

  8. Монгол Улс дахь салбар, нэгжийн хаяг эсхүл Монгол Улс дахь томилогдсон төлөөлөгч (ажилтан)-ийн холбоо барих хаягууд (утас, факс, ц/ш, SITA, AFS г.м).

5.1.3 Нислэгийн хүсэлт гаргагч (дотоодын) нь орон нутагт шинээр нислэг үйлдэхэд дараах баримт бичгийг бүрдүүлнэ. Үүнд:

  1. Агаарын тээвэрлэгчийн гэрчилгээ;

  2. Агаарын хөлгийн улсын бүртгэлийн гэрчилгээ;

  3. Агаарын хөлгийн нислэгт тэнцэх чадварын гэрчилгээ;

  4. Даатгалын мэдээлэл;

  5. Зам тээврийн асуудал эрхэлсэн төрийн захиргааны төв байгууллагын томилгоо бичиг.

  6. Агаарын тээвэрлэгчийн албан ёсны хаяг.

5.2  Хуваарьт бус нислэг
5.2.1 Нислэгийн хүсэлт гаргагч нь олон улсын хөөрөлт, буултын нислэг үйлдэхэд дараах баримт бичгийг бүрдүүлнэ. Үүнд:

  1. Агаарын тээвэрлэгчийн гэрчилгээ (Арилжааны бус нислэг үйлддэг хувийн эзэмшлийн агаарын хөлөгт агаарын тээвэрлэгчийн гэрчилгээ шаардахгүй байж болно);

  2. Агаарын хөлгийн улсын бүртгэлийн гэрчилгээ;

  3. Агаарын хөлгийн нислэгт тэнцэх чадварын гэрчилгээ;

  4. Даатгалын мэдээлэл;

  5. Газрын үйлчилгээний мэдээлэл;

  6. Аюултай барааны мэдээлэл.

Тэмдэглэл: Дотоодын агаарын тээвэрлэгчид зөвхөн f-р зүйлд хамаарна.

5.2.2 Нислэгийн хүсэлт гаргагч нь орон нутагт нислэг үйлдэхэд дараах баримт бичгийг бүрдүүлнэ. Үүнд:

  1. Хилийн бүсэд нислэг үйлдэх бол Хил хамгаалах ерөнхий газраас олгосон зөвшөөрөл;

  2. Монгол Улсын AIP-аар зарлан мэдээлээгүй аэродром болон хэлипортод хөөрөлт, буултын нислэг үйлдэх бол ИНД-ийн хүрээнд нийцсэн баримт бичиг;

  3. Дархан цаазат газарт хөөрөлт, буултын нислэг үйлдэх бол холбогдох эрх бүхий байгууллагаас олгосон зөвшөөрөл;

5.2.3 Нислэгийн хүсэлт гаргагч (дотоодын) нь орон нутагт шинээр нислэг үйлдэхэд дараах баримт бичгийг бүрдүүлнэ. Үүнд:

  1. Агаарын тээврийн гэрчилгээ (арилжааны бус нислэг үйлддэг хувийн эзэмшлийн агаарын хөлөгт агаарын тээвэрлэгчийн гэрчилгээ шаардахгүй байж болно);

  2. Агаарын хөлгийн улсын бүртгэлийн гэрчилгээ;

  3. Агаарын хөлгийн нислэгт тэнцэх чадварын гэрчилгээ;

  4. Даатгалын мэдээлэл.

5.2.4 Нислэгийн хүсэлт гаргагч (гадаад улсын) нь орон нутагт нислэг үйлдэхэд дараах баримт бичгийг бүрдүүлнэ. Үүнд:

  1. Агаарын тээвэрлэгчийн гэрчилгээ (арилжааны бус нислэг үйлддэг хувийн эзэмшлийн агаарын хөлөгт агаарын тээвэрлэгчийн гэрчилгээ шаардахгүй байж болно);

  2. Агаарын хөлгийн улсын бүртгэлийн гэрчилгээ;

  3. Агаарын хөлгийн нислэгт тэнцэх чадварын гэрчилгээ;

  4. Даатгалын мэдээлэл;

  5. Гүйцэтгэх ажлын төрөл, захиалагчтай байгуулсан гэрээ;

  6. Нислэг үйлдэх чиглэл, маршрут, ажлын талбайн бүдүүвч, байрлах газрын солбицол.

6.  Ерөнхий зориулалтын нисэх

6.1 Хяналтгүй агаарын зайд нислэг үйлдэх тохиолдолд нислэгийн төлөвлөгөө (FPL)-г Нислэгийн хөдөлгөөний үйлчилгээний байгууллагад Иргэний нисэхийн дүрмийн дагуу ирүүлнэ.
6.2 Ерөнхий зориулалтын нисэхийн үйл ажиллагааны нислэгийн аюулгүй байдлыг агаарын хөлөг эзэмшигч хариуцна.
6.3 Хяналтгүй агаарын зайнаас хяналттай агаарын зайд, хяналттай агаарын зайнаас хяналтгүй агаарын зайд нислэг үйлдэх бол нислэгийн хүсэлтийг журмын дагуу Нислэгийн урсгал төлөвлөлтийн албанд ирүүлсэн байна.