ENR 1.3  Хэрэглэлийн нислэгийн дүрмүүд

1.  Ерөнхий

1.1 Агаарын хөлөг нь байрлалаа тодорхойлоход шаардлагатай зохих хэрэглэлүүд болон навигацийн тоног төхөөрөмжүүдээр тоноглогдсон байна.

2.  IFR-ийн нислэгийн төлөвлөгөө

2.1 ENR 1.10 "Нислэгийн төлөвлөлт"-өөс хар.
2.2 НХҮ-гүй аэродром дээр буултыг зохих журмын дагуу үйлдсэнээр нислэгийн төлөвлөгөөг дууссанд тооцно.
2.3 IFR-ийн нислэгийн төлөвлөгөөг хүргүүлсэн үед агаарын хөлгийн дарга доор дурдсанаас бусад үед нислэгийн хүчин төгөлдөр төлөвлөгөөг дагаж мөрдөнө:

  1. өөрчлөлт оруулах тухай хүсэлт гаргаагүй бөгөөд НХУ-аас өөр зөвшөөрөл олгоогүй бол;

  2. нислэгийн төлөвлөгөөг яаралтай өөрчлөх онцгой тохиолдлын нөхцөл байдал бий болоогүй бол.

2.4 IFR-ээр нислэг үйлдэж буй агаарын хөлгийн дарга нь хүчинтэй нислэгийн төлөвлөгөө өөрчлөгдсөн тохиолдолд НХҮ-ний зохих нэгжид доор дурдсан зүйлсийг мэдээлнэ:

  1. замд гарсан аливаа өөрчлөлт;

  2. жинхэнэ хурд 5% буюу түүнээс ихээр өөрчлөгдсөн эсхүл нислэгийн төлөвлөгөөнд өгөгдсөн МАХ тооны +- 0.01 буюу түүнээс ихээр өөрчлөгдсөн;

  3. НХҮ-ний нэгжид мэдээлсэн дараагийн илтгэх цэгийг нисэн өнгөрөх тооцоот цагт 2 минутаас их алдаа гарсан тохиолдолд шинэчилсэн нисэн өнгөрөх тооцоот цаг.

3.  IFR-ээр хөөрөх ба буух

3.1  Аэродромд хэрэглэлээр ойртолт үйлдэх
3.1.1 Аливаа аэродромд хэрэглэлээр ойртолт үйлдэх шаардлагатай тохиолдолд IFR-ээр нислэг үйлдэж буй агаарын хөлгийн дарга нь хэрэглэлээр ойртолт үйлдэх стандарт журмыг ашиглана.
3.2  Зөвшөөрөгдсөн DA, DH ба MDA
3.2.1 Мөр 3.1.1-д заасан хэрэглэлээр ойртолт үйлдэх журамд шийдвэр гаргах өндрийн-түвшин (DA), шийдвэр гаргах өндөр (DH), эсхүл өндөр алдах минимум өндрийн-түвшин (MDA)-үүдийн аль нэгийг ашиглахаар заасан бол, агаарын хөлгийн дарга нь доор дурдсан DA, DH эсхүл MDA-ийн аль ихийг нь ашиглана:

  1. хэрэглэлээр ойртолт үйлдэх журамд заасан DA, DH эсхүл MDA;

  2. агаарын хөлгийн даргад зориулсан DA, DH эсхүл MDA;

  3. агаарын хөлөгт зориулсан DA, DH эсхүл MDA.

3.3  DA, DH ба MDA-ээс нам өндрийн нислэг
3.3.1 DA, DH эсхүл MDA-ийг ашиглаж байгаа тохиолдолд агаарын хөлгийн дарга нь доор дурдсанаас бусад тохиолдолд аливаа аэродромд агаарын хөлгөөр тогтоосон MDA-ээс нам өндөрт нислэг үйлдэхгүй бөгөөд мөр 3.2.1-д заасан DA эсхүл DH-ээс доош өндөрт хэрэглэлээр ойртолт үйлдэх журмаар нислэгийг үргэлжлүүлэхгүй:

  1. агаарын хөлөг нь хэвийн маневрууд ашиглан өндөр алдалтын хэвийн түвшинд буулт хийхээр төлөвлөсөн ХБЗ-ны газардах бүсэд газардах боломжтой байршилд тогтмол байвал;

  2. нислэгийн алсын барааны харагдац нь ашиглаж буй хэрэглэлээр ойртолт үйлдэх журамд заасан алсын барааны харагдацаас багагүй байвал.

3.4  Буулт
3.4.1 Нислэгийн алсын барааны харагдац нь ашиглаж буй хэрэглэлээр ойртолт үйлдэх журамд заасан алсын барааны харагдацаас бага тохиолдолд агаарын хөлгийн дарга нь агаарын хөлгөөр буулт үйлдэхгүй.
3.5  Хоёрдугаар тойрогт гарах журам
3.5.1 Агаарын хөлгийн дарга нь хоёрдугаар тойрогт гарах журмыг дараах тохиолдолд мөрдөнө:

  1. Мөр 3.3.1-д заасан шаардлагуудыг хангаагүй бол:

    1. агаарын хөлөг MDA-ээс доош өндөрт нислэг үйлдэж байгаа үед;

    2. шийдвэр гаргах өндрийг /DA, DH/ тогтоосон бөгөөд тэдгээрийг ашиглах шаардлагатай нөхцөлд хоёрдугаар тойрогт гарах цэгт (MAPt) нисэн ирэх үед;

  2. MDA буюу түүнээс дээш өндөрт тойрог нислэгийн маневр хийж байх үед аэродромын тодорхой хэсгүүд нь нисгэгчид ил тод харагдахгүй байвал.

3.6  Хөөрөлтийн хязгаарлалтууд
3.6.1 Мөр 3.7-д зааснаас бусад тохиолдолд доор дурдсан цаг агаарын нөхцлүүд бүрдээгүй бол агаарын хөлгийн дарга нь аэродромоос IFR-ээр хөөрөлт үйлдэхгүй:

  1. тухайн аэродромоос IFR-ээр хөөрөлт үйлдэх цаг агаарын хязгаарлалтаас дээш;

  2. тухайн аэродромд IFR-ээр хөөрөлт үйлдэх цаг агаарын хязгаарлалтуудыг тогтоогоогүй тохиолдолд 100 метрээс доошгүй үүлний доод суурийн өндөр болон 1500 метрээс дээш алсын барааны харагдацтай.

3.7  Хөөрөлтийн багасгасан хязгаарлалтууд
3.7.1 Агаарын хөлгийн дарга нь дараах нөхцлүүд бүрдсэн тохиолдолд алсын барааны харагдац 800м буюу түүнээс дээш нөхцөлд үүлний доод суурийн өндрийг үл харгалзан IFR-ээр хөөрөлт үйлдэж болно:

  1. ХБЗ-ны гол шугам нь тэмдэглэгээ эсхүл гэрэлтүүлэгтэй бол;

  2. ХБЗ-ны гол шугамын тэмдэглэгээ эсхүл гэрэлтүүлгийг ажигласны үндсэн дээр агаарын хөлгийн дарга хөөрөлтийн цаг агаарын алсын барааны харагдацыг баталгаажуулсан бол;

  3. тухайн ХБЗ-т хөөрөлтийн багасгасан хязгаарлалт хэрэглэхийг зөвшөөрсөн бол;

  4. хөөрөлтийн нислэгийн замд байгаа бүх саадуудыг тооцоолсон бол;

  5. хэрэв агаарын хөлөг нь сэнст хоёр хөдөлгүүртэй онгоц бөгөөд автофлюгерийн ажиллагаа бүхий системээр тоноглогдсон бол.

4.  IFR-ийн нислэгийн түвшин

4.1 ENR 1.7 "Алтиметрийн тохируулгын журмууд"-аас хар.
4.2 НХУ-аас өгсөн зөвшөөрлийн дагуу хүлээх бүсэд нислэг үйлдэж буй агаарын хөлөгт ENR 1.7-ийн мөр 1.3 болон мөр 2-т үзүүлсэн хүснэгт хамаарахгүй.

5.  IFR нислэгүүдийн минимум өндрийн-түвшин

5.1 ENR 1.1-ийн мөр 5.2-оос хар.

6.  Мөстөлттэй үед нислэг үйлдэх

6.1 Мөр 6.2-т зааснаас бусад тохиолдолд IFR-ээр нислэг үйлдэж буй агаарын хөлгийн дарга нь дараах нөхцлүүдэд хөөрөлт үйлдэхгүй:

  1. агаарын хөлгийн сэнс, цонхны урд шил, хөдөлгүүрийн агаар орох хэсэг эсхүл хурд, өндөр, өндөр авалтын түвшин буюу нислэгийн өндрийн-түвшин заах системд цас, мөс тогтсон буюу цантсан байвал;

  2. агаарын хөлгийн далавч, стабилизатор буюу удирдлагын гадаргууд цас, мөс тогтсон буюу цантсан байвал;

  3. агаарын хөлөг нь мөстөлтөөс хамгаалах төхөөрөмжгүй тохиолдолд мэдэгдэж байгаа буюу урьдчилсан мэдээгээр мөстөлттэй бүсэд.

6.2 Агаарын хөлгийн дарга нь агаарын хөлгийн нислэгийн гарын авлага эсхүл цас, мөс, цанталттай нөхцөлд хөөрөлт үйлдэх талаар агаарын хөлөг үйлдвэрлэгчээс гаргасан зааварчилгаануудын дагуу гүйцэтгэсэн тохиолдолд агаарын хөлөгт цас, мөс тогтсон буюу цантсан нөхцөлд хөөрөлт үйлдэж болно.
6.3 Цаг агаарын урьдчилсан мэдээ, мэдээллээр нислэг мөстөлттэй нөхцөлд явагдах байсан боловч цаг агаарын өөрчлөлтийн улмаас тухайн нислэгийн хугацаанд мөстөлтийн нөхцөл бий болохгүй тухай нислэгийн өмнөх цаг агаарын сүүлчийн мэдээллийг агаарын хөлгийн дарга авсан бол мөр 6.1.b-д заасан урьдчилсан нөхцөлд үндэслэсэн хязгаарлалт хамаарахгүй.

7.  IFR-ийн нислэгийн үеийн радио холбоо

7.1 НХУ-аас өөр зөвшөөрөл олгоогүй бол, IFR-ээр нислэг үйлдэж буй агаарын хөлгийн дарга нь:

  1. холбоо барьж буй давтамж дээр тогтмол сонсоно;

  2. дараах мэдээллийг холбоо барьж буй НХУ-д шуурхай мэдээлнэ:

    1. илтгэл өгөх тогтоосон замын цэгүүдийг нисэн өнгөрч байгаа цаг, өндрийн-түвшин, эсхүл НХУ-аас онцолж заасан мэдээлэл өгөх замын цэгүүд ба цаг

    2. нислэгийн аюулгүй ажиллагаанд хамаарах бусад мэдээлэл.

8.  IFR-ийн нислэгийн үед хоёр талын радио холбоо алдагдах

8.1 НХУ-аас өөр зааварчилгаа өгөөгүй тохиолдолд ил харааны цаг уурын нөхцөлд IFR-ээр нислэг үйлдэж байгаа агаарын хөлгийн хоёр талын радио холбоо алдагдсан эсхүл холбоо алдагдсаны дараа ил харааны цаг уурын нөхцлүүд тулгарсан үед агаарын хөлгийн дарга нь нислэгийг VFR-ийн дагуу үргэлжлүүлэх бөгөөд хамгийн ойрын тохиромжтой аэродромд аль болох хурдан хугацаанд бууна.
8.2 НХУ-аас өөр зааварчилгаа өгөөгүй тохиолдолд хэрэглэлийн цаг уурын нөхцөлд IFR-ээр нислэг үйлдэж байгаа агаарын хөлгийн хоёр талын холбоо алдагдсан үед агаарын хөлгийн дарга нь нислэгийг мөр 8.3-д заасны дагуу зөвшөөрөл хязгаарлагдах цэг хүртэл үргэлжлүүлэх бөгөөд энэхүү хугацаанд доор дурдсан арга хэмжээг авна:

  1. хэрэв зөвшөөрөл хязгаарлагдах цэг нь ойртолт эхэлдэг цэг бол өндөр алдах буюу хэрэглэлийн ойртолтыг доор дурдсаны дагуу үйлдэнэ:

    1. урьд нь мэдээлсэн, дараагийн цэгийг нисэн өнгөрөх тооцоот цагт аль болох ойртох; эсхүл

    2. дараагийн зөвшөөрөл өгөх цэгийг хүлээн аваагүй бол, НХУ-д урьд нь илтгэсэн дараагийн цэгийг нисэн өнгөрөхөөр тооцоолсон буюу мэдээлсэн цагт аль болох ойртох.

  2. хэрэв зөвшөөрөл хязгаарлагдах цэг нь ойртолт үйлдэж эхэлдэг цэг биш бол:

    1. зөвшөөрөл хязгаарлагдах цэгийг урьдчилан мэдээлсэн тооцоот цагт нисэн өнгөрөх;

    2. ойртолт эхлэх цэг рүү үргэлжлүүлэн ниснэ;

    3. өндөр алдан ойртолт үйлдэх эхлэлийг НХУ-д мэдээлсэн буюу нисэн очих тооцоот цагт аль ойрхон хийнэ.

8.3 Агаарын хөлгийн дарга нь хэрэглэлийн цаг уурын нөхцөлд IFR-ийн дагуу нислэг үйлдэж байх явцад хоёр талын радио холбоо алдагдсан тохиолдолд дараах байдлаар нислэгийг үргэлжлүүлнэ.

  1. Дараах нислэгийн замуудын аль нэгээр:

    1. НХУ-аас хүлээн авсан сүүлийн зөвшөөрөлд заасан нислэгийн зам;

    2. хэрэв радараар чиглүүлэн удирдаж байвал, радио холбоо алдагдсан цэгээс НХУ-аас чиглэл өгч заасан цэг, навигацийн цэг буюу зам хүрэх шулуун нислэгийн зам;

    3. ямар нэг товлосон нислэгийн зам байхгүй бол дараагийн зөвшөөрөлд өгч болох НХУ-аас мэдээлсэн нислэгийн зам;

    4. ямар нэг товлосон нислэгийн зам байхгүй бол дараагийн зөвшөөрөлд НХУ-аас өгч болох нислэгийн төлөвлөгөөнд орсон нислэгийн зам.

  2. Нислэг үйлдэх нислэгийн замын хэсгүүдийн дараах өндрийн-түвшин буюу нислэгийн түвшиний аль өндөрт нь ниснэ:

    1. НХУ-аас зөвшөөрсөн өндрийн-түвшин эсхүл нислэгийн түвшин;

    2. Нислэгийн минимум өндрийн-түвшин;

    3. НХУ-аас дараагийн зөвшөөрөлд өгч болох өндрийн-түвшин эсхүл нислэгийн түвшин.

  3. ATIS-ийн зохих давтамж дээр сонсох ажиглалт зогсолтгүй явуулна.

9.  Байршил илтгэх

9.1 Тогтоосон илтгэх цэгийн дээгүүр нисч буй агаарын хөлөг нь НХУ-ын холбогдох нэгжид байрлалаа яаралтай илтгэнэ. Байршил илтгэхдээ дараах зүйлсийг мэдээлнэ:

  1. Агаарын хөлгийн дуудлага;

  2. Байршил;

  3. Цаг ба минутаар илэрхийлсэн хугацаа;

  4. Нислэгийн өндрийн-түвшин (эсхүл нислэгийн түвшин) ба нислэгийн нөхцлүүд;

  5. Дараагийн илтгэх цэгээр нисэн өнгөрөх тооцоот хугацаа буюу буулт хийх аэродромд нисэн ирэх тооцоот хугацаа;

  6. НХУ-ын нэгжээс хүссэн буюу нисэх багаас илтгэх шаардлагатай гэж үзсэн бусад мэдээлэл.