1.1 Хүлээх, ойртолт үйлдэх, нисэн гарах журмууд нь ICAO-ийн Doc 8168 (PANS-OPS)-ийн хүчин төгөлдөр хувилбарт нийцсэн байна.

1.2 Хүлээх бүсэд нислэг үйлдэж буй агаарын хөлөг хэрэглэлийн нислэгийн журмуудад заагдсан хүлээх нислэгийн журмыг мөрдөнө.

1.3 Хүлээх бүсэд нислэг үйлдэж буй агаарын хөлгийн дарга нь зөвхөн НХҮ-ний нэгжээс олгогдсон зөвшөөрлийг үндэслэн нислэгийн түвшинг өөрчилж болно.

1.4 Багц нислэгийг нэг нислэгт тооцох ба багийн ахлагчид өгөгдсөн зөвлөмж, зааварчилгааг багийн бүх гишүүд дагаж мөрдөх үүрэгтэй.

2.1 Аэродромд буулт үйлдэх агаарын хөлөг ойртолтын болон аэродромын удирдлагын цамхагтай холбоо тогтооно. Агаарын хөлөгт НХҮ-ний нэгжээс холбогдох зөвшөөрлийг Ойртолтын удирдлагын бүс (TMA)-ийн хилийг огтлохоос өмнө агаарын хөлөгт дамжуулсан байна.

2.2 Агаарын хөлөг нислэгийн хөдөлгөөний байдал, цаг уурын хүндрэлтэй нөхцлөөс шалтгаалан хүлээх бүсэд нислэг үйлдэх бол НХҮ-ний нэгжээс дараагийн маневр хийж эхлэх хугацаа эсвэл ойртолт үйлдэх товлосон цаг (EAT)-ийг нисэх багт зааварчилж болно. Хүлээх хугацаа нь 15 минут болон түүнээс их бол ойртолт үйлдэж эхлэх хугацааг, хэрэв 15 минутаас бага бол нисэх багт нислэгийн хөдөлгөөнөөс шалтгаалсан сааталгүй болохыг мэдээлж болно.

2.3 НХҮ-ний нэгжээс агаарын хөлгийг аливаа цэгт хүлээлгэх бол тодорхой түвшин болон хугацааг дурдана. Хэрэв зөвшөөрлийн хязгаар нь цаашдын зааварчилгааны хүрээнд багтахгүй бол нисэх баг хамгийн сүүлийн өгөгдсөн түвшинг хадгалан нисэх үүрэгтэй.

2.4 НХҮ-ний нэгжээс зөвшөөрөгдсөн ил харааны нислэгийн онцгой дүрмээр нисч байгаагаас бусад тохиолдолд тойрог нислэгээр зөвхөн ил харааны нислэгийн цаг уурын нөхцөлд буулт хийнэ.

3.1 Нислэгийн хөдөлгөөний удирдлагатай аэродромоос нисэн гарах IFR нислэгүүдэд аэродромын удирдлагын цамхагаас нислэгийн хөдөлгөөний удирдлагын зөвшөөрлийг хүлээн авч баталгаажуулна. Тухайн зөвшөөрлийн хязгаар нь нисэн очих аэродром хүртэл байвал зохино.

3.2 Нислэгийн маневр шаардагдах тохиолдолд агаарын хөлөг хөөрөлт үйлдэхээс өмнө нисэх багт мэдээлсэн байвал зохино.