ENR 5.6  Шувуудын нүүдэл ба зэрлэг ан амьтны бүсүүд

Монгол Улсын агаарын зайд шувууны нүүдэл жилийн турш явагддаг боловч 2-р сарын дунд үеэс 6-р сарын эхэн үе хүртэл (хаврын нүүдэл) мөн 8-р сарын дунд үеэс 11-р сарын төгсгөл үе хүртэл (намрын нүүдэл) илүү идэвхиждэг.

Шувууд олон тоогоор нүүдэллэх гол шалтгаан нь хэмийн өөрчлөлт болдог.

Шувуудын нүүдлийн замнал Ази-Номхон далайн бүс нутагт Номхон далайн баруун эргийн, Зүүн-Ази Австралийн, Төв-Ази Энэтхэгийн гэсэн үндсэн 3 чиглэлээр явагддаг.

Номхон далайн баруун эргийн чиглэлээр нүүдэг шувууд Монгол орны зүүн хагасаар, Зүүн-Ази Австралийн нүүдлийн шувууд Монгол орны бүх хэсгээр, Төв-Ази Энэтхэгийн нүүдлийн шувууд Монгол орны баруун хагасаар тус тус дайрч өнгөрдөг.

Монгол орны нүүдлийн шувуудын гол зам нь:

- Халх гол-Хэрлэн-Далай нуур;

- Номгон-Улаан нуур-Орхон-Сэлэнгэ;

- Бөөн цагаан нуур-Орог нуур-Байдраг /Түйн гол/-Хангайн нуруу арын голуудын ай сав, Хөвсгөл нуур;

- Халх гол-Хэрлэн туул-Сэлэнгэ;

- Улаан нуур-Бөөн цагаан-Хар ус нуур.

Зуны улиралд ихэнх шувуу 500 м-ээс нам өндрийн-түвшинд, махчин шувуу 1500-2000 м өндрийн-түвшинд, бүргэд, тас зарим үед 6000 м хүртэл өндөрт нисдэг байна. Шөнийн цагт нүүдлийн шувууны нислэгийн өндрийн-түвшин өдрийн цагаас илүү өндөр байдаг.